Me ardhjen e vjeshtës, një nga gjërat e para që bëjmë është të ndryshojmë garderobën. Nxjerrim palltot, trikot e buta, çizmet dhe ngjyrat më të thella.
Por, në një mënyrë shumë më të pavetëdijshme, ndryshojmë edhe parfumin.
Pa e kuptuar, aromat e freskëta, të lehta, të ëmbla, të verës fillojnë të na duken disi jashtë ritmit. Në vend të tyre, kërkojmë diçka më të ngrohtë, më të thellë, më mbështjellëse, diçka që të na përqafojë.
Aroma që shkojnë me shiun e parë dhe atë ndjesinë e bukur të rikthimit në shtëpi.
Dhe nëse, si unë, besoni se çdo stinë meriton parfumin e saj, atëherë vjeshta ka një botë të tërë për t’u eksploruar.
Kur mendoj për një parfum tipik vjeshte, mendja më shkon menjëherë te aromat ‘warm spicy’: kanellë, kakao, tobako, dru, amber, farë tonka… aroma që nuk të qëndrojnë thjesht mbi lëkurë, por krijojnë një atmosferë rreth teje.
Dhe një nga parfumet që e përfaqëson më bukur këtë ndjesi është Sundowner nga Tauer.
I lançuar në vitin 2021 dhe krijuar nga perfumeri Andy Tauer, Sundowner është një parfum që ndërtohet rreth notës së tobakos, kanellës, kakaos, farës tonka, vaniljes dhe amberit.
Por ajo që e bën interesant nuk është thjesht lista e notave. Është mënyra se si ato ndryshojnë dhe ndërthuren në lëkurë.
Në sekondat e para, do të ndjeni notat e kanellës, paksa portokallit duke i dhënë një nuancë të ngrohtë, disi të ëmbël.
Është ajo lloj kanelle më shumë aromatike dhe e thellë sesa sheqerore, jo ajo aroma shpuese; një nuancë që të sjell menjëherë ndërmend ditët vjeshtore, kuzhinën e ngrohtë, biskotat me kanellë që shpesheherë i presim me padurim dhe mbrëmjet e gjata.
Kakaoja shfaqet në sfond, duke i dhënë parfumit një teksturë më të butë dhe më të pasur. Nuk është një ëmbëlsi tipike gourmand; është më shumë një ndjesi e errët, pluhurore dhe elegante.
Pastaj vjen tobako…Dhe këtu fillon pjesa që e bën Sundowner vërtet interesant.
Pas hapjes pikante, tobako fillon të marrë gjithnjë e më shumë hapësirë. Ky akord shfaqet shumë realist, i thellë dhe i pasur; jo një tobako artificiale apo tepër e ëmbël, por me karakter, ngrohtësi dhe një nuancë paksa të thatë.
Në këtë moment, parfumi duket sikur ndryshon skenë.
Nga një hapje me kanellë dhe portokall, kalon në një botë më të errët: tobako, dru, amber dhe kakao.
Është pak si një shfaqje teatrale ku personazhet ndryshojnë njëri pas tjetrit, por historia mbetet gjithmonë e njëjta. Dhe pikërisht ky ndryshim e bën Sundowner kaq mbresëlënës.
Në ‘drydown’, druri i sandalit, fara tonka dhe vanilja e bëjnë kompozimin më të rrumbullakët dhe të butë, ndërsa nota e amberit dhe tobakos ruajnë thellësinë e tij.
Rezultati është një aromë e ngrohtë, e pasur, pak ‘smoky’ dhe pak gourmand, por gjithmonë me atë karakterin e veçantë të Tauer.
Sundowner nuk është parfumi që zgjedh kur dëshiron të kalosh pa u vënë re.
Është ai që vesh kur gjethet e para fillojnë të bien, kur ditët shkurtohen, mbrëmjet janë më të freskëta dhe për ato momente kur lëkura jote kërkon dicka të ngrohtë.
Nëse vjeshta do të kishte një aromë, Sundowner do të ishte një nga interpretimet e saj më të bukura.
Dhe ndoshta kjo është pikërisht arsyeja pse Sundowner nuk të kujton vetëm vjeshtën, por të bën ta ndjesh atë.