Gjithçka rreth lules së portokallit

Portokall, neroli, lule portokalli dhe petitgrain. Të gjithë i kemi parë të paktën një herë këto nota, por ku qëndron ndryshimi mes tyre?

Vetëm nga pema e portokallit ekzistojnë 4 karaktere të ndryshëm aromatik.

– Fruti i portokallit, që shpeshherë i referohet freskisë dhe ëmbëlsisë agrumore,.

– Neroli, vaji esencial i lules së bardhë të pemës së portokallit, Citrus Aurantium, i cili përftohet nëpërmjet procesit të destilimit me avull.

– Nga po e njëjta lule, përftohet edhe nota e lules së portokallit, orange blossom, pikërisht përmes metodës së ekstraktimit me solvent. Nëse do të përftohej nëpërmjet destilimit me avull, kjo do të shkatërronte disa nga notat e saj më të buta e kremoze.

Ndërkohë që neroli ka një karakter energjik, lulja e portokallit është feminile, sensuale dhe romantike. Mendoni këtu Tom Ford Neroli Portofino, Bvlgari Man Wood Neroli apo Prada l’Homme për ndjesinë energjike të nerolit dhe Elie Saab In White, Dolce & Gabbana Devotion apo Dior Addict Eau de Parfum për ndjesinë romantike të lules së portokallit.

Ndoshta më pak e njohura për ju, petitgrain, përftohet nga gjethet dhe degët e pemës së portokallit; pra karakterizohet nga një profil më herbal e pak të hidhur.

KURIOZITET

Neroli, është emërtuar i tillë nga qyteti Nerola në Itali. Princesha e Nerola, Anne Marie, ishte marrëzisht e dashuruar me vajin esencial të lules së bardhë të pemës së portokallit. Anne Marie ishte e para që destiloi lulen e portokallit për të përftuar vajin esencial, të cilin e përdorte për të aromatizuar veshjet e saj.